Першае верасня – радасны восеньскі дзень, напоўнены ўсмешкамі і кветкамі, свята для ўсіх дзяцей. Гэта яшчэ і Дзень ведаў, таму што школа – тое месца, дзе мы пазнаём шмат новага і цікавага пра навакольны свет, таямніцы прыроды і саміх сябе. Мы атрымліваем веды і навыкі, якія будуць карысныя нам на працягу ўсяго жыцця, а таксама вучымся разумець прыгажосць, мець зносіны з людзьмі, развіваць свае таленты.
У нашай школе шэсць хлопчыкаў і шэсць дзяўчынак сталі першакласнікамі. Для іх, самых маленькіх, трохі сарамлівых і спалоханых, але вельмі цікаўных, арганізавана свята. Кветкі, рознакаляровыя шары, музыка, новая прыгожаная форма… Колькі нязведанага наперадзе! Словы віншавання ў адрас першакласнікаў гучаць з вуснаў дырэктара школы, прадстаўніка базавай гаспадаркі, бацькоў. Вялікія букеты ад адзінаццацікласнікаў і кніга «Беларусь – наша Радзіма» падарунак Прэзідэнта А.Р.Лукашэнкі – гэта забыць ніяк нельга.
Першы ўрок «Я вырас тут, і край мне гэты дарагі» праводзіць настаўніца Ірына Аляксандраўна Лаўцэвіч. Разам з казачнымі героямі, Васілём і Васілісай, дзеці адпраўляюцца на цягніку ў чароўную Краіну ведаў. У склад цягніка ўваходзяць 12 вагонаў, у кожным з якіх дзеці малююць свой партрэт. На прыпынку «Родны востраў» дзеці распавядаюць пра той куточак, дзе кожны нарадзіўся, на «Востраве краязнаўчым» даведаліся пра аграгарадок Свіслач, яго гісторыю, памятныя мясціны і краявіды, на «Востраве Мірны» дзеці размалёўваюць блакітнае неба, вясёлае сонейка і яркую вясёлку, на «Востраве школьны» з шэрагу розных рэчаў выбіраюць і чырвоным алоўкам абводзяць тыя, якія патрэбны ў школе. У канцы ўрока дзеці даюць клятву старанна вучыцца і добра сябе паводзіць. Словы пажадання і парады гучаць для дзяцей і бацькоў: няхай гэты год, прынясе мноства новых адкрыццяў, няхай кожны дзень будзе яркім, запамінальным, плённым і напоўніцца толькі дадатнымі вынікамі, новым досведам і выдатным настроем.
Першае верасня – гэта яшчэ і Дзень мудрых слоў, пажаданняў і адкрыццяў. Для першаклашак ён становіцца пачаткам школьнага шляху, а для будучых выпускнікоў — не, не канцом, а кропкай адліку для новых здзяйсненняў і будучых перамог ужо ў сталым жыцці.
***
Паважаныя чытачы!
Запрашаем вас наведаць адзін з самых прыгожых куточкаў Беларусі –
аграгарадок Свіслач і школу, дзе вучням утульна і спакойна.
Знаёмцеся: першакласнікі
Свіслацкай сярэдняй школы!
Усіх разам нас дванаццаць
Мы — вясёлы і дружны клас.
Мы за год гэта дакажам!
А цяпер пра ўсіх раскажам.
Максім – сябар хоць куды,
З ім нам весела заўжды.
Гуляем разам і малюем,
І ніколі не сумуем.
Вось Карынка-весялінка,
Яе ўсмешка як іскрынка.
У шахматы гуляе лоўка.
І для ўсіх катоў сяброўка.
Наш Багдан – актыўны хлопчык,
Любіць спорт і жарты ён.
І ўсур’ёз яго чакае
Алімпійскі стадыён.
Аня – актывістка і спартсменка,
І ў любой навуцы рэкардсменка.
Знешне яна проста як карцінка —
Вельмі сімпатычная дзяўчынка.
Ілья – вельмі смелы і пазітыўны,
І на ўроках ён самы актыўны.
Здароўе сваё трымае ў норме,
Заўсёды Ілля ў выдатнай форме.
Надзя любіць спяваць, танцаваць,
Гуляць у футбол і маляваць.
Наведвае школу музычную,
Дзе творы іграе класічныя.
Лёша ў класе самы маленькі,
Але затое і самы ўдаленькі:
Любому ён рады дапамагаць.
Нам кожнаму хочацца з ім сябраваць.
Любіць наша Анжаліка
У вольны час памаляваць.
А яшчэ яна ўмее на ўроках разважаць.
Стане лепшай вучаніцай,
Бо стараецца вучыцца.
Цімафей у нас рухавы,
Любіць з мячыкам гуляць.
Стане хутка футбалістам!
Трэба толькі пачакаць.
Талентаў многа ў Васіліны:
Любіць чытаць, маляваць і спяваць.
Супер-дзяўчынка! І, безумоўна,
Ёй пашанцуе выдатніцай стаць.
Вось Ілля – цудоўны хлопчык.
Лепшы сябар ён для нас.
Па характару спакойны.
Увогуле, ён – першы клас!
Уся школа з павагай глядзіць на Вікторыю.
Ніхто без яе бы вучыцца не змог.
Не верыце? Сёлета гэта дзяўчынка
Званіла ў школе першы званок!
Нашы першыя ўраджанні:
Першы раз у першы клас
Мы прыйшлі ў верасні.
“Уводзіны ў школьнае жыццё” для нас
Цяпер ужо завершаны.
У школе будзем мы лічыць,
Чытаць, пісаць і маляваць.
На ўроках плённа працаваць,
Часта руку паднімаць.
Калі настане перапынак
Дружна разам пагуляем.
Мы любім гэты адпачынак
Яго ні на што не прамяняем.
У школе навучаецца 82 вучні 1-11 класаў, 10 з іх – выдатнікі. Працуюць 22 педагога, сярэдні ўзрост якіх 45 гадоў. Усе педагогі маюць вышэйшую педагагічную адукацыю. Калектыў дружны, зладжаны.
Традыцыі школы: святы чырвонага календара, штогоднія сустрэчы з выпускнікамі юбілейных выпускаў (5, 10, і г.д. гадоў пасля школы), свята ўраджаю, святы апошняга званка для вучняў 4, 9, 11 класаў, валанцёрская дзейнасць, спартакіяда з жыхарамі аг. Свіслач.
У пазаўрочны час у школе працуюць 6 гурткоў рознай накіраванасці. Вучні паспяхова ўдзельнічаюць у творчых і інтэлектуальных конкурсах. Мы ганарымся дасягненнямі вучняў у спартыўных спаборніцтвах, у другім этапе рэспубліканскіх прадметных алімпіяд, ў абласным конкурсе “Каложскія чытанні”, ў раённым конкурсе навукова-даследчых работ “Першыя крокі ў навуку”, ў абласным конкурсе даследчых праектаў “Празрыстыя хвалі Нарачы” (некалькі гадоў запар вучні абараняюць свае праекты ў Рэспубліканскім аздараўленчым лагеры “Зубраня”).
Школа ганарыцца сваімі былымі выпускнікамі. Вось некаторыя з іх: Жучко Леанід Уладзіміравіч – першы прарэктар Гродзенскага аграрнага ўніверсітэта (у мінулым), Матук (Бондар) Марыя Андрэеўна – загадчык упраўлення адукацыі Гомельскага аблвыканкама (у мінулым), Заткоўскі Рыгор Канстанцінавіч – урач алімпійскай зборнай РБ (у мінулым), Нерад Ніна Сільвестраўна – сакратар Мінскага гаркома партыі (у мінулым), Лойка Святлана Пятроўна – журналіст-аглядальнік г.Масква, Шумскі Іван Генрыхавіч – Доктар навук, навуковы супрацоўнік Акадэміі навук Рэспублікі Польшча, г. Варшава, Каладзейскі Вячаслаў Аляксандравіч – хірург, загадчык аддзялення бальніцы №2 г.Гродна і іншыя
Вучням ёсць з каго браць прыклад і мы верым, што ўсе дасягненні ў нашых першакласнікаў яшчэ наперадзе.
Ганна Сяргееўна ГВАЗДОЎСКАЯ,
Гродзенскі раён,
Свіслацкая школа.
