Напярэдадні прафесійнага свята пажарнай службы мая сям’я вырашыла адкрыць для сябе нешта новае і адправілася ў Цэнтр бяспекі МНС у Мінску.
З самага парога адчулі, што трапілі ў незвычайнае месца: тут не толькі вучаць, але і натхняюць. Экскурсія пачалася з кароткага знаёмства з дзейнасцю МНС – нам расказалі пра рэальныя выпадкі, дзе хуткасць, дакладнасць і веды ратавальнікаў выратавалі жыцці. Потым перамясціліся ў навучальныя зоны: змрочна задымлены пакой, гук сігналу і святло аварыйных ліхтароў стварылі атмасферу сапраўднай трывожнай сітуацыі. Гэта было не страшна, а надзвычай захапляльна!
У зоне пажарнай бяспекі трымалі ў руках агнягаснік, вучыліся ім карыстацца і разумелі, як дзейнічаць падчас узгарання. Уражлівыя дэманстрацыі і магчымасць усё выпрабаваць самастойна зрабілі гэты момант сапраўднай кульмінацыяй экскурсіі.
Напрыканцы зрабілі фота на памяць, набылі невялікія сувеніры – значкі і налепкі, а галоўнае – каштоўныя веды, якія могуць калісьці выратаваць жыццё.
Напярэдадні прафесійнага свята віншуем супрацоўнікаў МНС з Днём пажарнай службы Беларусі! Дзякуем за вашу гераічную працу, цярпенне, чалавечнасць і надзейнасць. Жадаем, каб кожны ваш выклік заканчваўся шчаслівым фіналам, а ў вашых сэрцах заўсёды жыла спакойная ўпэўненасць у правільнасці абранага шляху.
Ілья ЗМАЧЫНСКІ,
вучань 8-га класа «М»,
г. Дзяржынск, гімназія.
