16 студзеня даўняму сябру “Зорьки”, папулярнаму дзіцячаму паэту, лаўрэату Літаратурнай прэміі імя Янкі Маўра, прэміі Федэрацыі прафсаюзаў Беларусі, Літаратурнай прэміі “Залаты купідон”, выдатніку народнай асветы, выдатніку друку Беларусі, ганароваму грамадзяніну Буда-Кашалёўскага раёна Міколе Чарняўскаму споўнілася 75 гадоў. У гонар шаноўнага пісьменніка 24 студзеня адбылася цёплая сустрэча. Вядомыя пісьменнікі, кампазітары, прафесійныя артысты і творцы-аматары сабралiся на вечарыну, каб выказаць любоў і павагу выдатнаму паэту, зборнікі якога ніколі не пыляцца на палічках.
Рэдакцыя і падпісчыкі “Зорьки” далучаюцца да віншаванняў і сардэчна жадаюць багатырскага здароўя, новых дасягненняў, удзячных сонечных усмешак мільёнаў чытачоў. Неаднойчы публікаваліся радкі вядомых твораў Міколы Чарняўскага – прыкладаў нязгаслага таленту – на старонках выдання. Юнкоры пацвярджаюць: чароўны свет, які нараджаецца пад пяром майстра слова, зачароўвае і саміх маленькіх літаратараў, і іх бацькоў.
