У Жукоўшчынскім дзіцячым садзе базавай школе з 15 лютага 2021 года пачаўся тэматычны тыдзень “Мова родная – мова модная!”, прысвечаны святкаванню Міжнароднага дня беларускай мовы.
Дзень роднай мовы асаблівы для кожнай нацыі, кожнага народа, бо няма народа без мовы. Наша мова – спадчына, якую мы атрымліваем ад нашых бацькоў і павінны перадаць яе наступным пакаленням. А як лепш вывучаць беларускую мову? Трэба слухаць і гаварыць з тымі, хто ведае яе. Трэба глядзець тэлеперадачы, чытаць кнігі на беларускай мове. Трэба прыслухоўвацца да роднай мовы і ўбіраць усё самае цікавае, што засталося нам у спадчыну.
“Ніякае багацце людзей не бывае даражэйшым за іх родную мову”. Пад такім дэвізам 18 лютага ў рамках тэматычнага тыдня прайшла акцыя “Смак беларускай мовы”, якая была накіравана на папулярызацыю беларускай мовы, выхаванне цікавасці і любові да роднага слова.
Вучні 8 і 9 класаў, арганізатары акцыі, стварылі флаеры – невялікія па памеры інфарматыўныя лістоўкі, выкананыя ў яркіх фарбах, з яскравай беларускай лексікай і на працягу дня распаўсюджвалі іх сярод вучняў, педагогаў і работнікаў школы.
Вучні 3-4 класаў атрымалі флаеры з назвамі на беларускай мове прадметаў побыту. Вучням 5-7 класаў былі ўручаны флаеры з беларускімі назвамі сакавітых і смачных ягад. Акрамя гэтага яны мелі магчымасць падабраць прыказкі на беларускай мове пра час і працу, слова і мову, дом і сям’ю, сяброў, розум і веды. Настаўнікам і работнікам школы былі прапанаваны флаеры з цікавымі рэцэптамі беларускіх нацыянальных страў. Варта адзначыць, што на працягу дня вучні стараліся гаварыць па-беларуску і на ўроках, і на перапынках.
Марына ТАДАРЭНКА, вучаніца 9-га класа
Жукоўшчынскага дзіцячага сада-
базавай школы Дзятлаўскага раёна.
