Не бывае часовага патрыятызму. Яго альбо няма, альбо ён на ўсё жыццё. Нашы навучэнцы пастаянна пацвярджаюць сваю любоў да Радзімы.
Асаблівая ўвага напярэдадні 9 Мая надаецца помнікам. Навучэнцы Пархімаўскага ясляў-сада–базавай школы даўно шэфствуюць над помнікамі землякам, загінуўшым у гады Вялікай Айчыннай вайны ў аграгарадку Пархімаўцы і вёске Карпаўцы. Валанцёры, члены ГА «БРСМ», сочаць, каб іх тэрыторыя круглы год была чыстай і дагледжанай. А кожную вясну, добраўпарадкоўваюць месца яшчэ лепш, падрыхтоўваючы яго да самага галоўнага свята – Дня Перамогі.
Напярэдадні свята быў арганізаваны аўтобусны маршрут памяці «З лампадай ля Вечнага агню». Наведалі помнік землякам, загінуўшым у гады Вялікай Айчыннай вайны ў аграгарадку Пархімаўцы. Навучэнцы падрыхтавалі вершы. Было відаць, што для кожнага з іх гэта не проста чарговае выступленне, а магчымасць такім чынам выказаць падзяку за той подзвіг, які здзейснілі ветэраны. Па традыцыі хвілінай маўчання ўшанавалі памяць тых, хто загінуў, абараняючы родную зямлю, і ўсклалі кветкі да помніка. Далей удзельнікі маршруту наведалі помнікі землякам, загінуўшым у гады Вялікай Айчыннай вайны ў вёске Карпаўцы і аграгарадку Малая Бераставіца. Чацвёртым аб’ектам стаў помнік камандзіру мотастралковай дывізіі палкоўніку Геронцію Несцеравічу Цітаішвілі, які загінуў у баях за вызваленне нашай малой радзімы. Канчатковым пунктам маршруту стала магіла ахвяр фашызму ў аграгарадку Малая Бераставіца. Удзельнікі ўшанавалі памяць ахвяр фашызму хвілінай маўчання і запалілі лампадкі.
Сімвалічна, што сёлета 9 мая мы адзначалі і Дзень Дзяржаўнага герба Рэспублікі Беларусь і Дзяржаўнага сцяга Рэспублікі Беларусь – дзяржаўных сімвалаў, якія аб’ядноўваюць нас у самыя важныя моманты ў лёсе Айчыны… Для навучэнцаў 1–9-х класаў прайшоў інтэлектуальна-пазнавальны квэст. Вучні ўспаміналі слаўныя старонкі гісторыі Айчыны і яшчэ раз звярнуліся да сімволікі, якую трэба берагчы кожнаму з нас. Кульмінацыяй квэста стала акцыя «Праспяваем гімн Рэспублікі Беларусь разам!».
Важна памятаць подзвіг тых, хто ахвяраваў сваім жыццём дзеля будучыні краіны. Давайце разам шанаваць і захоўваць гісторыю нашай Радзімы!
Святлана Анатольеўна ВОЙШЭЛЬ,
класны кіраўнік 9-га класа.
Бераставіцкі раён,
Пархімаўскі яслі-сад–базавая школа.
