Славіцца зямля беларуская сапраўднымі песнярамі, майстрамі літаратурнага слова! Літаратурнаму мінуламу Бераставіччыны быў прысвечаны цікавы занятак у 9-м класе Старадварэцкага-ясляў-сада–базавай школы.
Нібы вясёлка на небе, пераліваліся прыгожым гучаннем вершы Галіны Жывіцы, якія чаравалі меладычнасцю і незвычайнасцю. З цікавасцю вучні слухалі сваіх сяброў, удзельнічалі ў абмеркаванні, выказвалі свае думкі. Прыгажосць роднага краю, зачараванасць яго краявідамі яшчэ раз прагучалі ў вершаваных радках і заставілі задумацца аб адказнасці кожнага чалавека за лёс Радзімы, за захаванне яе прыгажосці і непаўторнасці.
Асаблівая паэтычная старонка была прысвечана творчасці нашага земляка Івана Леткі. Сувязь з радзімай, роднымі мясцінамі Іван Антонавіч Летка пранёс праз усё жыццё і адлюстраваў у сваіх вершах. «І здаецца не ездзіў я за гары, лясы, а на выгане недзе толькі выйшаў з расы…». Вершы Івана Леткі заставілі вучняў задумацца аб тых мясцінах, дзе кожны з нас бярэ свой пачатак, дзе праходзіць дзяцінства і юнацтва – аб малой радзіме.
Знаёмства з творчасцю знакамітых паэтаў-землякоў – гэта своеасаблівае падарожжа па родным краі, тым краі, за лёс якога ў адказе кожны з нас.
Зоя Станіславаўна УЦЕПЯРГЕНАВА,
класны кіраўнік.
Бераставіцкі раён,
Старадварэцкі яслі-сад–базавая школа, 9-ты клас.
