З мэтай вывучэння гісторыі і традыцый беларускага народа навучэнцы Хвінявіцкага дзіцячага сада-сярэдняй школы Дзятлаўскага раёна прынялі ўдзел у анімацыйнай праграме “Цуда-печка” у Паўлаўскай этнагасцёўні Слонімскага раёна. У час экскурсіі рабяты даведаліся, што сярод мясцовых каравайніц існуе прымаўка: “Спячы каравай – як дзіця нарадзіць”. Праца гэта адказная, клапатлівая і вельмі цяжкая, таму пякуць каравай звычайна не менш за пяць чалавек. У першы дзень прапальваюць печ, у другі – замешваюць цеста для каравая, асобна для “шышак”, іх вырабляюць і выпякаюць, у наступны дзень каравай ўпрыгожваюць.
Для рабят быў праведзены майстар-клас пад кіраўніцтвам каравайніц па вырабу “шышак”, “кветак”, “птушак” з цеста. Пакуль зробленыя ўпрыгожванні выпякаліся ў печы, мясцовы дамавік праводзіў з гасцямі цікавыя народныя гульні і спаборніцтвы, рабяты адгадвалі загадкі, адказвалі на пытанні віктарыны, разам стварылі аркестр з розных музычных інструментаў. Затым усіх наведвальнікаў этнагасцёўні пачаставалі духмяным чаем са славутым Паўлаўскім караваем.
Усе рабяты везлі дадому духмяныя караваі, незабыўныя ўражанні пра цікавую сустрэчу і жаданне наведаць Паўлаўскую каравайню яшчэ раз.
Ала Іосіфаўна Паўлоўская,
класны кіраўнік 3-га класа,
Дзятлаўскі раён,
Хвінявіцкі дзіцячы сад-сярэдняя школа
