Навучэнцы аграрнага класа Дварэцкай школы у рамках практычных заняткаў наведалі сельскагаспадарчыя аб’екты дзяржаўнага прадпрыемства «Дварэц-Агра».
Факультатыўныя заняткі па праграме «Уводзіны ў аграрныя прафесіі» праводзяцца ў школе ўжо чацвёрты год запар. Мэта такіх заняткаў – выклікаць у вучняў зацікаўленасць да прафесій у сельскай гаспадарцы, азнаёміць іх з асновамі вядзення тэхналагічных працэсаў у аграрнай галіне.
На гэты раз тэмай заняткаў было электразабеспячэнне працэсаў сушкі і дапрацоўкі зерня на зернесушыльным комплексе КЗСВ-30 і забеспячэнне клімат-кантролю пры захоўванні бульбы ў бульбасховішчы арачнага тыпу.
Вучні наведалі малочна-таварны комплекс «Васявічы», дзе азнаёміліся з працэсам даення кароў у даільнай зале, работай халадзільнага абсталявання, асновамі ўліку статку і параметраў прадуктыўнасці кароў. Дапамаглі навучэнцам разабрацца ў тонкасцях тэхналагічных працэсаў спецыялісты мясцовага сельгаспрадпрыемства. Дзякуй ім за гэта!
Ала Міхайлаўна КАЗАК,
настаўнік.
Дзятлаўскі раён,
Дварэцкая школа.
