У рамках пілотнага праекта па арганізацыі і правядзенні экскурсій навучэнцы Войстамскай базавай школы актыўна ўключыліся ў працэс пазнання культурна-гістарычнай спадчыны і традыцый беларускага народа. На працягу гэтага навучальнага года былі наведаныя шматлікія гістарычныя аб’екты.
Цікавай и змястоўнай стала экскурсія ў горад Мінск у Нацыянальны гістарычны музей Рэспублікі Беларусь. Колькі радасці і захаплення прынесла яна вучням! Вы можа трымалі ў руках зуб маманта? Альбо рабілі адтуліну ў камені для сякеры? Не?! Тады вам тэрмінова трэба наведаць дадзеную культурную ўстанову. Цікавы аповяд з элементамі інтэрактыву і дыялогу зусім не падаўся працяглым і нудным працэсам. Наведаныя экспазіцыі музея, якія налічваюць больш за 500 тысяч адзінак захавання, ўразілі ўсіх. Клады з розных куточкаў Беларусі, каштоўныя дакументы, слуцкія паясы, калекцыя музычных інструментаў і зброі і многае іншае, убачанае ўласнымі вачыма, выклікае гордасць за краіну, яе народ і гісторыю. Любіце, пазнавайце свой край! Адпраўляйцеся ў падарожжы! А тым часам нас чакаюць і вабяць новыя цікавыя мясціны нашай Радзімы. Нашы вандроўкі працягваюцца.
Святлана Іванаўна НАСЯКАЙЛА,
настаўніца, кіраўнік школьнага краязнаўчага музея.
Смаргонскі раён, Войстамская базавая школа.
