Амаль кожны з нас у дзяцінстве выразаў з паперы сняжынкі – гэта было першае знаёмства з традыцыйным народным рамяством – выцінанкай. Зараз выцінанка мае шырокае прадстаўленне ў жыцці і быце: гэта афармленне паліграфічных выданняў (паштоўкі, кнігі, календары і інш.), афармленне інтэр’еру, прадстаўленне майстэрства на выставах, конкурсах, святах.
Выцінанка набывае новыя мастацкія і функцыянальныя якасці, мае шырокія перспектывы развіцця, дзякуючы сваёй выразнасці, даступнасці матэрыялаў і прастаце вырабу, узбагачае нацыянальную культуру. У 2021 годзе мастацтва выцінанкі стала элементам нематэрыяльнай культурнай спадчыны «Беларускае мастацтва выцінанкі». Пазнаёміла вучняў Палатоўскай базавай школы з творчым праектам «З веку ў век ідзе майстэрства» кіраўнік народнага клуба «Майстар» г. Полацка Іна Пятроўна Карандзей, якая правяла з вучнямі малодшых класаў майстар-клас «Дрэва жыцця». Яно з’яўляецца сімвалам эвалюцыі, яднання паміж зямным і нябесным. А яшчэ сімвалізуе абуджэнне жыцця ад зімовага сну.
Наталля Анатольеўна БОНДАР,
намеснік дырэктара па асноўнай дзейнасці,
Полацкі раён, Палатоўская базавая школа.
