Любая незнаёмая сітуацыя можа стаць для дзяцей небяспечнай. Тым больш, пазнаючы свет, яны толькі вучацца жыць. Мы, як дарослыя, павінны навучыць дзяцей правілам паводзін у незвычайных абставінах, каб зберагчы іх здароўе і жыццё.
У дашкольнай групе Пархімаўскай базавай школы створаны куток бяспекі, дзе абсталяваны сюжэтна-гульнявы цэнтр. Дарожныя знакі, святлафор, дарога… Макет вуліцы змяшчае ўсе неабходныя атрыбуты. Жыццёвыя ўмовы тут максімальна набліжаныя да рэальных. На тэму правіл паводзін у транспарце, на вуліцы, дома ў працы з дзецьмі таксама вельмі карыснымі з’яўляюцца настольна-друкаваныя гульні, розныя дыдактычныя матэрыялы.
Дзеці асабліва любяць удзельнічаць у сюжэтна-ралявых гульнях «Вуліца. Дарога. Правілы дарожнага руху», «Выратавальнікі». Хтосьці на некаторы час становіцца інспектарам ДАІ, хтосьці выступае пажарным, а хтосьці – кіроўцам, пасажырам, пешаходам. Мы разыгрываем розныя надзвычайныя сітуацыі, адпрацоўваем правілы паводзіны ў іх. У ролі герояў выступаюць як самі дзеці, так і лялькі, казачныя персанажы.
Часта мадэлюю для дзяцей сітуацыю і стаўлю перад імі пэўную задачу. Дзеці з цікавасцю, самастойна шукаюць рашэнне і, такім чынам, у гульнявой форме адпрацоўваць правілы паводзін у небяспечных абставінах. Менавіта так, у штучна створаных умовах, хлопчыкі і дзяўчынкі наглядна могуць упэўніцца ў тым, што надзвычайных сітуацый лепей пазбягаць. Аднак калі яны ўсё ж узніклі, трэба пастарацца не разгубіцца і выкарыстаць алгарытм дзеянняў, пра які яны даведаліся на занятку.
Няхай нашы дзеці ніколі не трапляюць у небяспечныя абставіны! А калі так здарыцца, будуць дасведчанымі, як сябе ў іх паводзіць.
Ірына Іосіфаўна ПАКАЧАЙЛА,
выхавальнік дашкольнай адукацыі.
Бераставіцкі раён, Пархімаўская базавая школа.
