Дэвізам дня ў аздараўленчым лагеры «Ладзеніцкія гарэзы» Ладзеніцкай базавай школы стала беларуская прыказка «Бацькоўскі край – для летніх вандровак рай!».
Нашы «гарэзы» адправіліся за новымі прыгодамі ў маляўнічае, поўнае таямніц і загадак месца – возера Свіцязь. Да паходу добра падрыхтаваліся: купальныя касцюмы, мячы, галаўныя ўборы, стратэгічны запас матуліных прысмакаў… Але пахмурнае надвор’е прадвызначала толькі пешую прагулку па беразе. Усім здавалася, што баўленне часу на возеры пад пагрозай. І тут выхавальнікі расказалі, што мы знаходзімся ў чароўным месцы, і, калі загадаць сваё запаветнае жаданне, то яно абавязкова збудзецца. Так і атрымалася! У хуткім часе хмары зніклі і азёрная вада адлюстравалася ў цёплых сонечных промнях.
Турыстычны бівак разбілі на беразе ля самай вады. Добра падсілкаваўшыся, хлопчыкі і дзяўчынкі сустрэліся з выратавальнікамі АСВОДа і яшчэ раз успомнілі, паўтарылі правілы бяспечных паводзін на вадзе.
І вось – даўгачаканы момант – водная феерыя на пяшчотных хвалях возера! Столькі радасных эмоцый, воклічаў, уражанняў даўно не чулі свіцязянскія старадрэвіны!
Ірына Паўлаўна ТАЛКАЧ,
выхавальнік аздараўленчага лагера «Ладзеніцкія гарэзы»,
Навагрудскі раён, Ладзеніцкая базавая школа.
