На базе школы № 4 г. Мінска адбылася прэм’ера спектакля «Маленькі прынц» па матывах аповесці-казкі Антуана дэ Сэнт-Экзюперы. Выступленне падрыхтавалі ўдзельнікі аматарскага аб’яднання «Купаласы» пад кіраўніцтвам настаўніцы беларускай мовы і літаратуры Таццяны Андрэеўны Вайцяховіч. Паглядзець спектакль прыехалі нават госці з Расіі.
Як расказала Таццяна Андрэеўна, назва аматарскага аб’яднання атрымалася выпадкова, яна ўтворана ад прозвішчаў знакамітых беларускіх пісьменнікаў Янкі Купалы і Якуба Коласа.
– У мінулым годзе, калі праводзілі літаратурную вечарыну «Песняры зямлі беларускай…», прысвечаную творчасці Янкі Купалы і Якуба Коласа, у адзін момант хацела сказаць: «Купала і Колас», і выпадкова прамовіла «Купалас». З таго часу гэтая назва замацавалася за намі, нават назвалі так суполку ў тэлеграме і інстаграме, – гаворыць кіраўнік аматарскага аб’яднання. – Часта назву чытаюць няправільна, з націскам на трэці склад, думаючы, што яна ўтворана ад слова «купал».
«Маленькі прынц» быў першай тэатральнай спробай творчага калектыву. Выбралі менавіта гэты твор для пастаноўкі, бо кніга агульнавядомая і зразумелая ўсім на любой мове. Падумалі, што калі атрымаецца добры спектакль, яго можна будзе выкарыстоўваць як візітную картку. Так і адбылося. Аднак, у гэтым годзе ўдзельнікі аматарскага аб’яднання вырашылі паўтарыць пастаноўку «Маленькага прынца». І на гэты раз – у пашыраным фармаце.
Я пацікавілася ў юных акцёраў іх уражаннямі ад пастаноўкі.
– Я выступала ў ролі апавядальніка. Шчыра кажучы, было вельмі хвалююча, але атрымалася, лічу, цікава, – разказвае Соня Кавалеўская, вучаніца 10-га класа. – Да прэм’еры рыхтаваліся каля паўтара месяца. Сённяшняга «Маленькага прынца» нельга параўноўваць з тым спектаклем, які ставілі два гады таму. Тады сцэнарый быў досыць скарочаны і просты. З дэкарацый выкарыстоўвалі толькі вулканы, а мінулая дзяўчынка-апавядальнік чытала тэкст. У гэты раз мне давялося ўсё вывучыць і расказваць».
А вось Івану Тураву, вучню 8-га класа, прыйшлося добра папрацаваць. – Таццяна Андрэеўна пры размеркаванні роляў адразу ж намеціла мяне каралём. Персанаж здаваўся нейтральным, але я думаю, што ён непадобны на мяне сапраўднага. Таму вельмі стараўся, каб атрымалася гарманічна, максімальна спрабаваў аддацца ролі, ды з дакладнасцю яе сыграць, – падзяліўся Іван.
Аўгуст Курмалёў, вучань 10-га класа, ужо мае акцёрскі вопыт – раней хлопец займаўся ў прыватнай акцёрскай школе.
– Мне вельмі падабаецца займацца ў гуртку, – кажа Аўгуст. – Мне дасталася роля Маленькага прынца. Лічу, што у мяне атрымалася давесці да гледача вобраз свайго героя, таму што з гэтым персанажам маю шмат агульных рысаў.
На выдатна з роляй змяі справілася Яраслава Сулейка, вучаніца 11-га класа. Свой вобраз дзяўчына стварала амаль што цалкам сама. Нават, вязала сцэнічны касцюм.
А вось дзесяцікласніцы Дашы Цысбалістай дасталася роля Ліса.
– З-за маіх рудых валасоў я іграю гэту ролю яшчэ з тых часоў, калі мы ўпершыню паставілі «Маленькага прынца». Магу адназначна сказаць, што раней больш хвалявалася на сцэне, часта магла забыць словы. Сёння мой Ліс вельмі спакойны і ўпэўнены. Хоць на сённяшняй прэм’еры я забылася некалькі слоў з-за хвалявання, але ўсё роўна выкруцілася! – падзялілася дзяўчына.
Для Лены Крышчановіч, вучаніцы 9-га класа, якая выступала ў вобразе чалавека, які пастаянна заняты справай, сённяшняя прэм’ера аказалася вельмі хвалюючай. Дзяўчына выступала ў тэатральнай пастаноўцы ўпершыню, але справілася дастойна. Прафесійна і ўпэўнена паводзіў сябе Яфім Ерашэнка, вучань 8-га класа. Хлопец працаваў у пастаноўцы гукарэжысёрам. Ён добра разбіраецца ў абсталяванні, таму што скончыў спецыяльныя курсы, а з 7-га класа праводзіць школьныя дыскатэкі, мерапрыемствы і канцэрты.
– Спектакль вельмі спадабаўся. Было цікава глядзець, – падзяліліся ўражаннямі госці, вучаніцы 8-га класа школы №639 г. Санкт-Пецярбурга Крысціна Іванова і Паліна Ларчанка. – Праўда мы ў нейкіх момантах не разумелі пэўныя словы, але так як руская і беларуская мовы даволі падобныя, хутка разабраліся. Дэкарацыі былі неверагодна прыгожыя. А саміх акцёраў падабралі сапраўды па знешнасці. Ролі яны выканалі вельмі добра!
Цінацін МАЙСУРАДЗЭ,
вучаніца 11-га класа «А»,
г. Мінск, школа № 4.
