У кожнага з нас ёсць асобае месца, якое мы любім больш за ўсё. Гэта маленькая вёсачка, горад, вуліца, бацькоўская хата. Гэта – малая радзіма. На пытанне «Што такое малая радзіма? » кожны адкажа па-свойму. Вось і выхаванцы аздараўленчага лагера «Зімовая акварэлька» Вензавецкай школы адказалі на яго.
Дзякуючы лагернай змене, вучні здзейснілі падарожжа па малой радзіме. З задавальненнем завіталі ў госці да Бабулі Зімы ў Вензавецкае лясніцтва і паўдзельнічалі ў навагоднім экалагічным квэсце. Шукалі ключы Бабулі Зімы, выконвалі заданні Баравічка, распутвалі зімовую павуціну каб завітаць у госці да дзеда Мароза і яго ўнучкі Снягуркі. Усе разам запалілі навагоднюю елку – прыгажуню, вадзілі карагоды, спявалі, танцавалі, расказвалі вершы.
Другі маршрут падарожжа – у аграсядзібу «Каля дуба», што ў вёсцы Цяцейкі на Дзятлаўшчыне. Прыгожая прырода і дабразычлівыя гаспадары Жанна і Сяргей Калпінскія «ўзялі ў палон» сэрцы дзяцей. Хлопчыкі і дзяўчынкі з цікавасцю пазнаёміліся з аграсядзібай, пачаставаліся прысмакамі каля самавара, пагрэліся на сапраўднай беларускай печы.
Трэці маршрут – Дзятлаўскі гісторыка-краязнаўчы музей. Тут выхаванцы лагера акунуліся ў гісторыю і паўдзельнічалі ў квэст-гульні «Новы год з Радзівілам». Дзеці з задавальненнем гулялі, выконвалі заданні, знаёміліся з гісторыяй Дзятлаўскага краю.
Да пабачэння, «Зімовая акварэлька»! Сустрэнемся з табою вясной і разам з «Вясновай акварэлькай» прадоўжым падарожжа па цудоўным краі роднай Бацькаўшчыны.
Наталля Іванаўна АБРАЖЭЙ,
старэйшы выхавальнік лагера «Зімняя какварэлька»,
Дятлаўскі раён, Вензавецкая школа.
