Пад такой назвай прайшла літаратурная гадзіна ў Падольскай сельскай бібліятэцы-клубе. Школьнікі разгледзілі вобраз бацькі ў літаратуры.
Бібліятэкар у даступнай форме расказала пра прыклады і характарыстыкі бацькоў у мастацкай літаратуры, паведала гісторыю свята, пагаварылі таксама пра ролю бацькі ў сям’і, пра яго ўплыў на дзяцей.
У рамках мерапрыемства была праведзена віншавальная акцыя «Мой тата самы лепшы», дзе жадаючыя змаглі расказаць, якімі яны бачаць сваіх татаў.
Каця Колтан, вучаніца 1-га класа: «Мой тата Дзяніс самы лепшы, самы добры і вясёлы. Ён працуе пагранічнікам. У вольны час любіць рамантаваць машыны, а яшчэ ездзіць на матацыкле. Тата заўсёды дорыць нам з мамай прыемныя падарункі, бо ён ведае нашы перавагі, і выбірае тыя, якія мы чакаем. З гонарам магу сказаць, што ён прысутнічаў на ўсіх ранішніках у дзіцячым садку і школе».
Рома Давідовіч, вучань 4-га класа: «А мой тата ўсебакова развіты. Ён працуе, нават калі яму штосьці баліць. Займацца хатняй гаспадаркай, корміць і даглядае жывёл, кіруе трактарам, умее араць. Ён таксама смачна гатуе, асабліва атрымліваюцца бліны з мачанкай і яечня. Любіць разам са мной праводзіць вольны час: чытаць кнігі і глядзець тэлевізар. Мой тата з цвёрдым характарам, але ў той жа час вельмі добры і вясёлы».
Маша Каралькевіч, вучаніца 3-га класа: «Мой тата працуе кіроўцам і з кожнай паездкі прывозіць мне нешта вельмі смачнае. Тата любіць лавіць рыбу, а потым і гатаваць яе. Увесь свой вольны час праводзім разам. Тата не баіцца цяжкасцей, ён адважны, смелы і вельмі добры».
Аляксандра Дыско, вучаніца 4-а класа: «Тата працуе лесніком і добра ведае кожную лясную палянку. У лесе ён адпачывае душой, любіць збіраць грыбы. Яшчэ тата майструе розныя вырабы з дрэва і жалеза. Знаходзячыся побач з татам, мне нічога не бывае страшна».
Аліна і Аня Ступенка, вучаніцы 6-га класа: «Наш тата вельмі клапоціцца пра нас. Ён заўсёды дае нам грошы на кішэнныя выдаткі, заўсёды з намі, падтрымлівае, гатовы дзеля нас на ўсё. Любіць рамантаваць машыны, глядзець тэлевізар, тапіць лазню. Наш тата самы лепшы, самы прыгожы».
Вольга Мечыславаўна ЗАЯНЧКОЎСКАЯ,
бібліятэкар Астравецкай раённай бібліятэкі.
