Кожны чалавек любіць святы. Я іх таксама люблю. А калі свята доўжыцца цэлы тыдзень, гэта цудоўна!
Нядаўна ў Дварэцкай школе праходзіў тыдзень талерантнасці, прымеркаваны да Міжнароднага дня інвалідаў. Слова незнаёмае для мяне. Усё, што цікавіла, даведалася з інфармацыі на стэндзе. Колькі вясёлых мерапрыемстваў было арганізавана для мяне і маіх сяброў! Удзельнічалі ў конкурсе эмблем талерантнасці. Кожны змог паказаць свой талент у маляванні. У старэйшых класах адбыліся гутарка-дыялог «Што значыць сяброўства», фотаквэст «Сяброўства пачынаецца з усмешкі». Усе наведалі відэасалон «Кожны мае права быць розным». Мы глядзелі цікавы фільм, а потым абмяркоўвалі яго і змаглі выказаць сваю думку. А яшчэ вучні 6-га класа знялі вясёлы відэаролік пра тое, як важна ў жыцці дапамога сяброў. Усе разам гулялі ў гульні, удзельнічалі ў спартландыі.
Час праляцеў хутка. У апошні дзень з самага ранку атрымалі рознакаляровыя падарункі-сэрцайкі з пажаданнямі. Колькі добрых слоў было адрасавана нам! На душы стала цёпла і прыемна. Хлопчыкі і дзяўчынкі падарылі нам частку сваіх сэрцаў, увагу, клопат, любоў. Вялікі дзякуй, сябры!
Надзея ПРАКАПЧУК,
вучаніца 3-га класа,
Дзятлаўскі раён, Дварэцкая школа
