Пачаткоўцы – маленькія творцы, якім больш за ўсё падабаецца майстраваць сваімі рукамі. Не дзіўна, што пасля ўдзелу ў класным мерапрыемстве, прысвечаным народнай творчасцi, першакласнікі-другакласнікі зацікавіліся мастацтвам Глыбоччыны.
У глыбоцкім Доме рамёстваў вучняў шчыра прывітала дырэктар Святлана Анатольеўна Скавырка і запрасіла на выставу Таццяны Анатольеўны Фаміной “Набываючы майстэрства”. Дзеці з за-давальненнем слухалі расповяд аўтара і дзівіліся, якія цудоўныя вырабы стварыла Таццяна Анатольеўна.
Майстар ганчарнай справы Арцём Мікалаевіч Фамін паклікаў на заняткі. Трэба было бачыць, з якім захап-леннем і стараннасцю не па ўзросту сур’ёзныя хлопчыкі, дзяўчынкі ляпілі з гліны снегавікоў!
Не менш клопатаў і ўра-жанняў было ў майстэрні Алены Сяргееўны Дабравольскай. Паясы з нітачак, сплеценыя дзецьмі, ператварыліся ў чароўныя шнурочкі жаданняў.
Пачаткоўцы разглядвалі цацкі, прымяралі калядныя маскі ад майстра па дрэву Віктара Баляслававіча Дудкевіча.
Вучань 2-га класа Мікіта Мішута прапанаваў: “Давайце выйдзем за дзверы, а потым увойдзем… Як быццам зноў прыехалі павучыцца навыкам ткацтва, выцінанкі, пляцення з саломкі, вырабу драўляных цацак!”
Валянціна Антонаўна ВАНЁНАК,
Ганна Станіславаўна ФЁДАРАВА,
настаўнікі пачатковых класаў.
Глыбоцкі раён,
Карабоўская дзіцячы сад–сярэдняя школа імя Р. І. Мацеюна.
