Гэтым летам мне пашчасціла адправіцца ў незабыўную вандроўку разам з турыстычным лагерам у Цэнтр экалагічнага турызму «Станьково», што знаходзіцца недалёка вёскі Станькава. Гэтае месца стала сапраўдным адкрыццём – тут можна не толькі адпачыць на прыродзе, але і даведацца шмат цікавага пра жывёл, расліны і экалогію Беларусі.
Наш лагер адправіўся пешшу раніцай, і ўжо праз паўгадзіны мы апынуліся ў маляўнічым месцы, дзе густыя лясы чаргуюцца з утульнымі палянамі. У цэнтры нас сустрэў гід, які правёў экскурсію па тэрыторыі. Даведаліся, што тут ёсць міні-запаведнік, дзе жывуць алені, казулі, зубры, ваўкі і нават мядзведзь!
Адна з самых яркіх частак паездкі – наведванне вальераў з жывёламі. Назіралі, як дзікі мірна пасвяцца, а ваўкі з цікаўнасцю глядзелі на нас з-за кустоў. Гід расказаў, як жывёлы трапілі ў цэнтр, як за імі даглядаюць і чаму важна захоўваць прыродны баланс.
Пасля экскурсіі размясціліся на спецыяльнай пляцоўцы для турыстаў. Там гулялі ў спартыўныя гульні і ўдзельнічалі ў квэстах.
Цэнтр «Станьково» не толькі пра забавы. Нам правялі заняткі па экалогіі, дзе вучыліся распазнаваць сляды жывёл, вызначаць расліны і размаўлялі пра тое, як кожны можа дапамагчы прыродзе. Гэта было вельмі пазнавальна і натхняльна.
Падарожжа стала для мяне не толькі прыгодай, але і магчымасцю глыбей зразумець прыроду роднага краю. Навучыўся больш шанаваць жывёльны свет, правёў час з сябрамі і атрымаў мноства яркіх эмоцый. Калі вы шукаеце месца для адпачынку з сэнсам – «Станьково» ідэальны выбар!
Ілья ЗМАЧЫНСКІ,
выхаванец аздараўленчага лагера «Турыст»,
г. Дзяржынск, раённы цэнтр турызму і краязнаўства.
