Даўняй традыцыяй ў Начаўскай школе з’яўляецца работа па добраўпарадкаванні былой сядзібы Чарноцкіх. Гэты ўнікальны палаца-паркавы ансамбль захаваўся ў аграгарадку Нача з 1810-1815 гг.
Прадстаўнікі роду Чарноцкіх былі сапраўднымі патрыётамі сваёй радзімы. Яны захапляліся зборам беларускага фальклору, часта запрашалі да сябе ў госці знакамітага этнографа і фалькларыста Міхала Федароўскага, разам з якім слухалі народныя песні ў выкананні мясцовых сялян. А Напалеон Чарноцкі ў 1928 годзе нават выдаў артыкул «Батлейка з ваколіц Начы», дзе распавёў пра свае дзіцячыя гады і апісаў беларускую батлейку.
Да сённяшніх дзён сядзіба захавалася ў даволі добрым становішчы. Асабліва ўражвае панскі парк, які спалучае ў сабе сонечныя палянкі і дрэвы-веліканы, каменны столік і «камень кахання», памятныя валуны і альтанкі. Канешне, і парк, і сядзіба патрабуюць гаспадарчага догляду.
Разам з прадстаўнікамі мясцовага ДП «Нача» школьны калектыў штогод шчыруе на гэтай тэрыторыі. У чэрвені ў рамках другаснай занятасці васьмікласнікі ачышчалі асфальтавыя дарожкі, зграбалі скошаную траву, збіралі ламачча і смецце ў панскай сядзібе. Стараліся зрабіць сваю работу адказна і шчыра, каб наведвальнікам і гасцям сядзібы было прыемна і ўтульна. Кожны дзень сюды прыходзяць людзі, каб адпачыць у засені векавых дрэў, паслухаць залівістыя спевы птушак і падыхаць чыстым паветрам. А яшчэ – каб не забыць культурную спадчыну, якая сведчыць аб непаўторным каларыце беларускага народа.
Ганна Міхайлаўна ПАДГУРСКАЯ,
настаўнік.
Ляхавіцкі раён,
Начаўская школа.
