Шумяць па-новаму дубровы –
На край свой люба мне зірнуць.
Цябе, зямля ў адзенні новым,
Хацеў бы к сэрцу прыгарнуць!
Якуб Колас.
Літаратурна-творчая сустрэча да 140-годдзя народнага паэта Беларусі Якуба Коласа адбылася ў музычнай зале Мазырскага дзіцячага дома.
…Гучыць песня «Мой родны кут» у выкананні ансамбля «Песняроў». Хлопчыкі і дзяўчынкі, якія прыйшлі на сустрэчу крышачку раней, з задавальненнем падпяваюць знаёмыя радкі песні. Прыемная асалода ад беларускага слова, ад мовы нашай мілагучнай – адлюстроўваюць добразычлівыя погляды дзяцей. Пачынае свята Паша Ігнаценка, ён чытае ўрывак «О край родны, край прыгожы!..» з паэмы « Сымон-музыка».
Потым выйшлі два хлапчукі, апранутыя ў беларускае адзенне. Яны па чарзе данеслі да слухачоў біяграфічныя звесткі народнага паэта. Суправаджэнне відэасюжэтаў перанесла ўсіх у родныя мясціны – туды, дзе нарадзіўся, дзе прайшло дзяцінства хлапчука Кастуся Міцкевіча. Вызваў інтарэс ў дзяцей запіс жывога голаса Якуба Коласа, які ў сваім выступленні ў далекім 1952 годзе распавядаў пра родную мову, пра цяжкае яе станаўленне. Пасля гэтага пачаліся гучныя літаратурныя чытанні вершаваных твораў паэта. Дзеці стараліся чытаць выразна, з нейкай індывідуальнай інтанацыяй, з душэўным эмацыянальным надхненнем.
Далей звярнулі ўвагу на кіжную выставу пад прыгожай назвай «Уладар беларускага слова». Аглядалі фотаздымкі пісьменніка, гучна называлі выданні, творы. Затым была творчая работа. Дзеці адбіралі сабе прыгатаваныя з каляровай паперы лісточкі – хто кляновыя, а хто дубовыя, пісалі на іх некалькі вершаваных радкоў з твораў Якуба Коласа, ды размалёўвалі ронакаляровымі ўзорамі. Гэтымі лісточкамі ўпрыгожылі кніжную выставу мастацкай літаратуры нашага юбіляра. Гэта – наш падарунак Якубу Коласу ў дзень яго нараджэння.
Ушанаванне памяці вялікага нацыянальнага песняра, ушанаванне яго творчасці, яго любові да бацькаўшчыны, да мовы роднай – дае нам моц ганарыцца сваей роднай краінай, песняром зямлі беларускай, славутым сынам беларускага слова.
Алена Станіславаўна КАСЦЯНКА,
бібліятэкар.
г. Мазыр, дзіцячы дом.
