Традыцыйнае мерапрыемства у народным комплексна-краязнаўчым музеі «Вытокі» Лойкаўскай школы – «Сэлфі ў музеі».
Усе жадаючыя могуць зрабіць фота на фоне экспанатаў. Найбольш папулярнымі музейнымі прадметамі ў малодшых школьнікаў былі лялькі, зробленыя з ільну, дзіцячыя абіякі, плеценыя лапці, вышываны фартух гаспадыні.
Гліняныя вырабы, прадметы з «бабінага кута», саматканыя ручнікі, сялянская печ сталі аб’ектам для фотаздымкаў у дзяўчынак сярэдняга і старэйшага ўзросту. А ўвагу хлопцаў прыцягвалі сельскагаспадарчыя прылады працы, збруя для каня, мужчынскія боты. «Ццяпер ведаем, што боты – гэта абутак беларусаў, а не чат-боты ў тэлефоне», – пажартаваў Аляксей Жук.
Выпускніца школы, пераможца рэспубліканскага конкурсу юных экскурсаводаў у 2023 годзе Ангеліна Жук зрабіла на памяць сэлфі з ручнікамі. Аляксея Ваявоцкага зацікавіў хамут. Ён успомніў сялянскі падворак і дзядулевага каня па мянушцы «Танцор». Наведвальнікі размяшчалі фотаздымкі ў сваіх акаўнтах і сацыяльных сетках.
А можа і вы хочаце зрабіць на памяць сэлфі з сапраўдным біўнем маманта, патрымаць у руках старажытную крамянёвую сякеру, размалоць зерне на каменных жорнах? Тады запрашаем у народны музей «Вытокі» ў аграгарадку Лойкі Гродзенскага раёна!
Люцына Чаславаўна РАМАНЧУК,
кіраўнік народнага комплексна-краязнаўчага музея «Вытокі»,
Гродзенскі раён, Лойкаўская школа.
