У філіяле «Рытанская сельская бібліятэка» адкрылася выстава «Свет захапленняў Вольгі Кухарчык», на якой прадстаўлены вырабы майстра: куфары, карціны па нумарах і вышываныя шэдэўры.
Чытачы, заходзячы ў бібліятэку, захоплена спыняюцца каля выставы, любуюцца прыгажосцю, якую стварыла іх зямлячка Вольга Іванаўна. Яе ў вёсцы добра ведаюць і паважаюць. Больш за трыццаць год жанчына аддала педагогіцы. Яна працавала настаўніцай пачатковых класаў. Жанчына адзначае, што працуючы з дзецьмі, нельга абысціся без творчасці. Сваіх маленькіх выхаванцаў настаўніца з асалодай і задавальненнем вучыла рабіць адмысловыя паштоўкі, каляровыя аплікацыі і многія другія рэчы.
У свой час рукадзеллем займалася матуля і старэйшая сястра Вольгі Іванаўны. Менавіта яны сталі прыкладам для жанчыны. Яна захоплена назірала за працай мамы і марыла, што калі-небудзь і з-пад яе іголкі будуць выглядаць такія ж акуратныя крыжыкі, складая цэласную карціну. Крок за крокам рукадзельніца ішла да сваёй мэты: асвойвала новыя тэхнікі, вывучала дадатковую літаратуру, праглядала ролікі ў інтэрнэце. Першапачаткова з-пад яе пруткоў пачалі з’яўляцца цёплыя шкарпэткі і камізэлькі для хатніх, крыху пазней – вытанчаныя сурвэткі і абрусы. Вышыўкай жанчына займаецца больш за 20 гадоў. За гэты час у доме з’явілася безліч вышываных карцін. Многія з іх былі падараваны родным, сваякам і сябрам. Доўгі час яе працы ўпрыгожвалі Дом дзіцячай творчасці ў Астраўцы. Вольга Іванаўна адзначае, што ўсе жыццё жыла згодна з прынцыпам – вочы баяцца, а рукі працуюць. Жыццёвы дэвіз яе ніколі не падводзіў.
Ёсць у жанчыны і мара: вярнуцца да бісерапляцення і ствараць упрыгожанні для жанчын. Завушніцы і бранзалеты, выкананыя ў такой тэхніцы, асабліва прыгожыя і вытанчаныя. Зараз жанчыну захапілі карціны па нумарах.
Аднавяскоўцы і сябры часта захапляюцца працамі майстра. Да пахвалы жанчына адносіцца спакойна. Яна лічыць, што творчы працэс прыносіць карысць душы чалавека.
Вольга Мечыславаўна ЗАЯНЧКОЎСКАЯ,
бібліятэкар Астравецкай раённай бібліятэкі.
