Фальклор – важны набытак нашага народа, дзякуючы якому ва ўсё часы фарміравалася культура і звычаі. Праз прыказкі людзі вучыліся мудрасці, праз легенды – далучаліся да гісторыі, праз песні – да традыцыйнага мастацтва. Кожны фальклорны твор – каштоўны камень, які далучае да галоўнага.
Каб паказаць важнасць фальклору ў жыцці чалавека, у Альхоўскай сельскай бібліятэцы прайшла адмысловая гадзіна “Скарбы зямлі роднай”. На працягу мерапрыемства яго ўдзельнікі прыгадвалі традыцыйныя беларускія святы, іх значэнне і абрадавасць. Каляды, Купалле, Дзяды – кожнае свята адмысловае, унікальнае і самабытнае. Удзельнікі мерапрыемства прыгадвалі пэўныя факты з гісторыі святкавання, а таксама абмяркоўвалі абрады ў сваёй мясцовасці. Пагутарылі і аб тым, як сучаснасць уплыве на традыцыі. Зразумела, што многія элементы адышлі ў нябыт, але многае застаецца і зараз, гарманічна ўпісваючыся ў сучасны кантэкст. На мерапрыемстве прысутнічалі і інтэрактыўныя элементы: гульні і віктарыны на веданне народных традыцый. Адмысловая выстава “Скарбы зямлі маёй” дапамагла наглядна пазнаёміцца з фальклорам як часткай беларускай культуры.
Фальклорная гадзіна дапамагла атрымаць новыя веды, пазнаёміцца з цікавымі фактамі, а таксама паказала вялікую значнасць вуснай народнай творчасці. Дзякуючы гэтаму кожны стаў на крок бліжэй да сваёй культуры.
Вольга Мечыславаўна ЗАЯНЧКОЎСКАЯ,
бібліятэкар Астравецкай раённай бібліятэкі.
