У 5-м класе «А» Радунскай школы адбылася абарона праекта «Мясцовыя стравы» ў рамках навучальнага модуля «Смачна было, ды блізка дно». Дадзены творчы праект прызначаны для ажыццяўлення вучнямі 5-га класа вучэбнай дзейнасці на факультатыўных занятках па праграме «Шчаслівы беларусам звацца».
Праект накіраваны на даследаванне мясцовых беларускіх страў; на фарміраванне ў вучняў павагі і любові да гісторыі нашых продкаў; на выхаванне культуры працы і цікавасці да традыцыйнага беларускага кулінарнага майстэрства; на развіцце эстэтычнага густу, творчага падыходу да вывучэння матэрыялу.
На працягу пяці гадзін вучні знаёміліся з традыцыямі беларускай нацыянальнай кухні, з паняццем «рэцэпт», «разлік прадуктаў», «дзённае меню», «тэхналагічная карта», з агульнапрынятай структурай кнігі рэцэптаў, з інфармацыяй пра вялікую колькасць традыцый, звязаных з хлебапячэннем. А яшчэ аналізавалі літаратурныя тэксты, чыталі, запаўнялі і карэкціравалі табліцы пры падрыхтоўцы матэрыялаў пра мясцовыя беларускія стравы.
Таксама адбылося прадстаўленне і дэгустацыя прыгатаваных з дапамогай бацькоў мясцовых страў.
Галіна Мар’янаўна ЛЯВОН,
настаўнік беларускай мовы і літаратуры,
Воранаўскі раён, Радунская школа.
