Педагогі Навагрудскага раённага цэнтра творчасці дзяцей і моладзі арганізавалі пазнавальны квэст “Па слядах Перамогі. Памятаем. Ушаноўваем. Ганарымся.” для вучняў 7-га класа “А”. Дзве каманды расшыфроўвалі пры дапамозе адмысловага шыфру назвы гарадоў-герояў, супастаўлялі фотаздымкі піянераў-герояў з іх імёнамі, расказвалі пра гераічныя ўчынкі, знаходзілі на карце Навагрудка вуліцы, названыя ў гонар герояў Вялікай Айчыннай вайны, якія нарадзіліся на Навагрудчыне.
Затым выхаванцы прынялі ўдзел у цікавай экалагічнай віктарыне, дазналіся шмат карыснага пра лекавыя расліны, жывёл, якія занесены ў Чырвоную кнігу Беларусі.
Напрыканцы чакала карысная сустрэча з супрацоўнікамі Міністэрства па надзвычайных сітуацыях Рэспублікі Беларусь. Спецыялісты ў займальнай форме напомнілі, якія дзеянні трэба выконваць у першую чаргу падчас пажару.
Валянціна Віктараўна МАНЮК,
настаўніца беларускай мовы і літаратуры.
г. Навагрудак,
школа № 7.
