У час школьных канікул у нашай установе адукацыі Раготнаўскім дзіцячым садзе–базавай школе заўсёды працуе аздараўленчы лагер «Усмешка». Як толькі пачынаюцца канікулы, жыхары аграгарадка, праходзячы міма школы, бачаць ярка ўпрыгожаныя вокны, якія ззяюць рознакаляровасцю літар і кветак і ствараюць самы добры настрой.
Творча, з фантазіяй і стараннем рыхтаваліся педагогі да працоўнага дня. Пад кіраўніцтвам клапатлівых настаўнікаў дзяўчынкі, хлопчыкі падрыхтавалі восеньскія падзелкі і арганізавалі іх выставу.
Шмат пазітыву выхаванцы лагера атрымалі ад экскурсіі ў горад Дзятлава. Ветліва сустрэлі групу навучэнцаў у Дзятлаўскім аддзеле Дэпартамента аховы МУС Рэспублікі Беларусь. Лейтэнант міліцыі Дзяніс Анатольевіч Шэўчык цікава і даступна расказаў, якія задачы выконваюць супрацоўнікі.
Другая частка экскурсіі была прысвечана 75-годдзю Вялікай Перамогі ў Вялікай Айчынай вайне. Асабліва доўга рабяты затрымаліся на мемарыяльным комплексе «Дзеці ліхалецця»: разглядалі пліты з надпісамі і былі вельмі ўсхваляваныя жорсткасцю, бесчалавечнасцю ворагаў.
Ксюша ЯКАЎЧЫК, вучаніцы 8-га класа.
Дзятлаўскі раён, Раготнаўскі дзіцячы сад–базавая школа.
