Прырода — гэта ўсё тое, што вакол нас: лясы, палі, лугі, рэкі. Кожнае з пералічанага – сапраўдная таямніца ці непрачытаная кніга. Колькі яе не чытай – яна кожны раз адкрывае нам нешта новае, нязведанае.
Фарміраванню экалагічнай культуры вучняў, уменню бачыць прыгожае, выхаванню жадання берагчы і ахоўваць прыроду садзейнічала інтэрактыўная гульня «Знатакі прыроды», якая прайшла ў 3-м класе.
На пачатку мерапрыемства была праведзена гутарка, якая дазволіла актывізаваць пазнаваўчую дзейнасць, накіраваць намаганні дзяцей на пошук вырашэння праблем па ахове і захаванні прыроды. А затым раздзяліліся на дзве каманды – «Чабарок» і «Верасок». За кожны правільны адказ каманда атрымоўвала жэтон.
За час гульні дзеці пабывалі ў «Бюро прагнозаў», дзе трэба было вызначыць па прыкметах, добрае ці дрэннае надвор’е яны прадказваюць, прывесці свае прыклады. Завіталі ў лясное царства, дзе можна было сустрэцца з «зялёнымі сябрамі» і братамі нашымі меншымі, паслухаць спевы птушак. Зазірнулі ў «Куфэрак таямніц», дзе былі схаваны прыродныя каштоўнасці. Самым напружаным і цікавым этапам гульні быў бліц-турнір, дзе камандам трэба было за адну хвіліну адказаць на большую колькасць пытанняў. У ходзе гульні дзецям прыйшлося пераадолець рад выпрабаванняў, з якімі яны справіліся на «выдатна». За актыўны ўдзел і веды ў галіне экалогіі вучні атрымалі граматы.
А на завяршэнні мерапрыемства выхаванцы падзяліліся сваімі меркаваннямі аб тым, якую пасільную дапамогу яны ў сілах аказаць, каб захаваць прыроду. Гэта ўдзел у акцыях «Збяры макулатуру-захавай дрэва», «Кожнай птушцы па кармушцы», «Ачысцім планету ад смецця».
Таццяна Канстанцінаўна АГЕЙ,
класны кіраўнік 3-га класа.
Свіслацкі раён,
Ханявіцкі дзіцячы сад-сярэдняя школа.
