У 11-м классе Пескаўскай школы выхоўваюцца таленавітыя вучні з актыўнай грамадзянскай пазіцыяй. Яны перамагаюць у розных конкурсах, алімпіядах, навукова-практычных канферэнцыях, актыўна ўдзельнічаюць у патрыятычных і дабрачынных акцыях. Навучэнцы разам з класным кіраўніком сабраліся за круглым сталом, каб паразважаць аб Канстытуцыі Рэспублікі Беларусь – асноўным законе нашай дзяржавы.
Канстытуцыйныя прынцыпы і нормы вызначаюць патрэбнасці чалавека ў годным жыцці і развіцці ў якасці мэты функцыянавання ўсіх формаў уласнасці, сацыяльных інстытутаў. У Рэспубліцы Беларусь ахоўваецца здароўе грамадзян, гарантуюцца правы на працу і адпачынак, адукацыю, сацыяльнае забеспячэнне, спрыяльнае навакольнае асяроддзе, на ўдзел у культурным жыцці. Пад абаронай дзяржавы знаходзяцца шлюб, сям’я, мацярынства, бацькоўства і дзяцінства. Асноўны закон упарадкоўвае адносіны паміж чалавекам і дзяржавай, а таксама людзей паміж сабой, забяспечваючы ў грамадстве парадак і стабільнасць, калі мы можам спакойна жыць і ведаць, што знаходзімся пад надзейнай абаронай і маем пэўныя гарантыі.
Падчас размовы выпускнікі адзначылі, што наша дзяржава стварыла ўсе неабходныя ўмовы для свабоднага і эфектыўнага ўдзелу моладзі ў развіцці краіны. У кожным раёне функцыянуе Маладзёжны парламент. З гэтай трыбуны маладыя грамадзяне Рэспублікі Беларусь даносяць да кожнага, што здаровая, развітая, мэтанакіраваная моладзь з’яўляецца залогам росквіту краіны і яе эканамічнай бяспекі ў будучыні. У 2022 годзе абноўленая Канстытуцыя Рэспублікі Беларусь дапоўнена артыкулам аб стварэнні дзяржавай неабходных умоў для свабоднага і эфектыўнага ўдзелу моладзі ў палітычным, сацыяльным, эканамічным і культурным жыцці, рэалізацыі яе патэнцыялу ў інтарэсах усяго грамадства. Вельмі станоўчыя вынікі, як падкрэслілі навучэнцы, прыносяць сустрэчы моладзі з прадстаўнікамі мясцовай улады, мясцовага Савета дэпутатаў, раённага аддзела ўнутраных спраў, ваенкамата, падчас якіх моладзь можа вырашыць пытанні, якія яе цікавяць.
Маладыя грамадзяне Рэспублікі Беларусь разумеюць, што абавязаны дзяржаве за тое, што яна давярае ім сваю будучыню. Менавіта моладзь вызначае будучыню краіны, магчымыя перспектывы яе развіцця. Выпускнікі падкрэслілі, што ад высокадухоўнай, патрыятычнай моладзі, якая ведае прынцыпы маралі, якія на працягу стагоддзяў перадаваліся з вуснаў у вусны, ад бацькі да сына, ад старэйшага пакалення да малодшага, будзе залежаць поспех краіны ў будучыні. А зразумець гэта моладзі дапамагаюць маладзёжныя форумы, дыялогавыя пляцоўкі, сустрэчы з цікавымі і паспяховымі людзьмі, частыя экскурсіі ў вышэйшыя навучальныя ўстановы.
Сваёй зацікаўленасцю, сваімі карыснымі справамі, патрыятызмам сённяшнія выпускнікі паказваюць краіне, што сучасная беларуская моладзь – мабільная, нацэленая на поспех, валодае высокім патэнцыялам, гатовая дамагацца сваіх мэтаў і з’яўляецца стваральнай часткай грамадства, для якой важныя як развіццё дзяржавы, так і асабістая самарэалізацыя. А для самарэалізацыі ў нашай дзяржаве адкрытыя ўсе дзверы.
Зусім хутка мае выпускнікі пакінуць сцены школы. Свой дальнейшы лёс яны вызначылі – усе будуць паступаць у вышэйшыя навучальныя ўстановы нашай краіны. Пераканана, што сваім інтэлектам, сваім патрыятызмам, сваёй адданасцю роднай зямлі яны прынясуць вялікую карысць дзяржаве.
Галіна Іосіфаўна ГАЛАВЕНКА,
класны кіраўнік 11-га класа,
Мастоўскі раён, Пескаўская школа.
