Музей – гэта Храм мінулага, адлюстраванне сучаснасці, акно ў будучыню. Тут не проста захоўваюцца экспанаты, тут жыве гісторыя, фарміруюцца сапраўдныя грамадзяне Рэспублікі Беларусь.
Музей у нашай установе адукацыі функцыяніруе як цэнтр грамадзянска-патрыятычнага выхавання з 1984 года. Гэта ўнікальнае адукацыйнае асяроддзе, дзе школьнікі вывучаюць гісторыю роднага краю праз рэальныя экспанаты. Кожны раз, калі заходзіш у музей, ты дакранаешся да гісторыі. А мова музея, як кажуць, – гэта яго экспанаты.
Адным з такіх цікавых экспанатаў у нашым музеі стаў рэтра-чамаданчык. Першая і асаблівая каштоўнасць яго у тым, што ён быў выпушчаны ў канцы 50-х гадоў.
Зараз у школьную музейную практыку ўкараняюцца усё новыя і новыя інавацыйныя формы правядзення экскурсій. Адной з іх з’яўляецца «Музей у чамадане». Ідэя экскурсіі «Музей ў чамадане дае магчымасць мабільна разгарнуць выставу, прадставіць экспанаты. Экскурсію можна праводзіць ў любым памяшканні і нават на адкрытых пляцоўках.
Наш чамадан нам вельмі прыгадзіўся. Вось у ім мы і арганізавалі музей. У нас узнікла ідэя стварыць экспазіцыю «Дарогамі Перамогі», прысвечаную асабістым рэчам салдат часоў Вялікай Айчыннай вайны. Я, як экскурсавод, расказваю наведвальнікам пра трагічныя старонкі гісторыі нашага краю, паказваю ўнікальныя экспанаты: пажаўцелыя ад часу пісьмы- трохвугольнікі, лісты – пахавальні, падзякі салдатам за актыўныя баявыя дзеянні, узнагароды, асабістыя рэчы.
«Музей у чамадане» ўнікальны тым, што ўсе экспанаты выставы вучні могуць узяць у рукі, дэтальна разглядзець і прымераць на сабе.
Каб маладое пакаленне зразумела трагічнасць падзей Вялікай Айчыннай вайны, гераізм нашага народа, я лічу, што ваенную гісторыю варта паказваць іменна праз такія выставы.
Знаёмства вучняў школы з музейнымі экспанатамі перыяду Вялікай Айчыннай вайны не толькі ўзбагачае іх новымі ведамі, але і садзейнічае развіццю такіх рыс характару, як асуджэнне і непрыняцце зла,
спачуванне слабым і бездапаможным, гонар за сваіх суайчыннікаў і імкненне ўдасканальваць сябе.
Мілана ПЛАКСА,
экскурсавод школьнага гісторыка- краязнаўчага музея,
Клецкі раён, Грыцэвіцкая школа.
